انتى فاهمة انتى بتعملى ايه ؟؟

انتى فاهمة انتى بتعملى ايه؟

استفسار غرضه التعجب والاستنكار

مينفعش تاكل سكر كتير وتقول سنانى بتوجعنى ليه.
مينفعش تضرب كلب بطوبة وتقول عضنى ليه..
مينفعش تكونى ملفتة للنظر وتقولى هى الناس بتعاكسنى ليه.

لأن مش هينفع نكون كلنا محترمين لازم يكون فى حد مش محترم

ده قانون الدنيا لكل فعل رد فعل و نظرية الخير و الشر

عاوزين نتيجة يبقى كلنا نحترم نفسنا

مش الراجل يحترم نفسه و البنت تعمل ما بدالها

حل ده ايه بقى ان المجتمع نفسه يكون مترابط .
مترابط ازاى
ان واحد مثلا شايف ان البدى التوب والكت والجينز المحزق حرام ووجهة نظره صحيحة 100 % و متقدرش تقوله لا
فمتطلبش منه انه يلتأم فى المجتمع المترابط وانت بتتجاهل الطلب الاساسى ليه ان البنات تلبس لبس محترم اللى هو صحيح 100%..

هتقول البنت حرة تلبس اللى هى عاوزاه

هيقولك لا حريتها بتضرنى وانا كمان مضطر اكون حر وأضرها

هضرها ازاى مش هتحرش بيها طبعا لأ انا مجرد بس هحجب عنها مساعدتى ليها لو جرالها حاجة فى الشارع

و كده نبقى متعادلين هى تجاهلت رأينا و لبست اللى على كيفها واحنا نتجاهلها لو اتعرضت للى نبهناها ليه ومسمعتش كلامنا

هى ديه الحرية المريضة اللى موجودة برة فى الغرب وعاوزين ينقلولنا العدوى بتاعتها عاوزين يفكونا من بعض عاوزين كل واحد يعيش لوحده زيهم لا يراعى غيره ولا يحسسه انه موجود اصلا يلبس يقلع يتعرى يجوع يموت برده لوحده

*****

كل اللى بطلبه ان البنت تتحرك مع الولد خطوة بخطوة لأنهاء المشكلة اللى هى بتشتكى منها و لأرضاء ربها اللى قادر يحوش عنها الاذى ويبعتلها النجدة وقت اللزوم . ده غلط ؟

اى حاجة تحصل غير كده مصر بعد كام سنة هتبقى نظام دويلات صغيرة كل دويلة لا تمت بصلة للتانية

وكل واحدة فيهم رافضة تسمع التانية
ناس هتكون متدينة شوية وناس قالعة خالص وناس بتتمرجح فى النص
و عليه العوض

كل واحد فينا كبير كفاية انه يعرف الصح فين والغلط فين .

و خلاص بقينا فى زمن محدش فيه هيقدر يجبرك على الصح ولا حد هيقدر يمنعك عن الغلط

احنا متفقين ان اى بنت مهما لبست مش من حق اى حد يقربلها او يعتدى عليها واعتدائه عليها او التعرض ليها غير مسموح نهائيا

اللى احنا اتفقنا عليه ده القاعدة او القانون

لكن الفارق كبير بين القاعدة القانونية اللى احنا قولناها ديه و القضية ذات نفسها

ايه هى القضية ؟

القضية هى انه بالرغم من وجود القانون فى تحرش

الى داخل على بنت وناوى يلمسها او يعملها حاجة عارف او على الاقل شاكك ان اللى بيعمله غلط و له عقاب

القانون متعملش عشان يعالج اسباب القضية القانون اتعمل عشان يعاقب المتسبب فى القضية

لو قولنا ان البنت من حقها تلبس اللى هى عاوزاه و اللى يقرب منها يتعاقب
اوك مفيش مشكلة لو فرضنا كل يوم هيقرب منها واحد

يبقى اخر السنة هيتحرش بيها 365 واحد كل واحد منهم ليه قضية واحدة بس واللى بيعمل كده مبيهموش قضايا لكن البنت ليها 365 قضية

يعنى اتعلم عليها 365 مرة يعنى بقى ليها 365 سمعة بقى ليها 365 قضية الناس هتختلف ان كانت ضحية ام مذنبة فيهم

ساعتها خلى البنت تفرح بعقاب الجناة

الولد مطالب انه يغض بصره عن اي بنت ماشية في الشارع حتى لو ماشية بمايوه

بس هي مطالبة انها تحافظ على نفسها ومش بس على نفسها

مطالبة انها بحريتها الشخصية اللي بتتكلم عنها ما تاذيش الشباب اللي ماشيين بأنها تنشر بينهم ان معاكسة البنت اللي مش ملتزمة هو عقابها على عدم التزامها

ماتشيلش كل واحد ماشي في الشارع سيئة لمجرد النظر ليها ما بالك لو كلمها ولا عمل اللي اكتر من كده
كده الموضوع خرج بره دايرة الحرية الشخصية وأصبح ضرر عام

من حقوق الطريق اللي بنمشي فيه كلنا واللي قالنا عليها الرسول عليه أفضل الصلاة والسلام حاجة اسمها كف الأذى

انك تتعرض لبنت وتضايقها ده أذى

انك تثيري ولد وتحولي غريزته لغريزة بهيمية من غير عقل ده أذى

انك تسمع بنت كلمة ممكن تخدش حياء طفل ماشي جنبك وسمعك ده أذى

انك تضحكي ضحكة تخلي أي واحد في الشارع يبصلك ويشيل ذنب ده أذى

انك تنشر الذعر بين الناس وتخلي بنات ماشيين متوقعين الخطر دايما ده أذى

انك تتسببي في ان واحد يكره مراته من كتر مابقى يشوف بنات عملت البدع علشان تظهر مفاتنها ده أذى

انك تسبب في ان طفل يشوفك بتعاكس ويقلدك ويمشي يعاكس ويضايق في خلق الله ده أذى

انك بلبسك تخلي البنت الصغيرة تكبر وهي حاطة في دماغها ان الطريقة الوحيدة علشان تنول نظرة اعجاب من ولد أو كلمة حلوة هي انها تبرز مفاتنها وتتجمل وتكشف جسمها ده أكبر أذى

والأمر بالمعروف، والنهي عن المنكر

من حقي لو شوفتك في الشارع لابسة لبس ضيق أقولك حراااام خافي على نفسك

ومن حقه لما يشوفك بتعاكس بنت يقولك احترم نفسك

من حقي أقول صوتك العالي في الشارع حرااااااام

ومن حقه يقولك اللألفاظ الخارجة اللي بتقولها للبنات حرااااااام

من حقي اقولك ان كل واحد هيبص لمفاتنك هياخد سيئة ويعدي لكن انتي لحد ماتوصلي هتكوني أخدتي كام سيئة ؟

ومن حقه يقولك البنت الي هتتسببلها في حالة نفسية سيئة لما تمد ايدك عليها وتلمسها ممكن بدعوة ربنا يردهالك في اقرب حد ليك وبشكل افظع

اتعلمتوا كلمة انا حرة و تحت شعار الحرية بتعملوا كل حاجة وأى حاجة

احنا ناس الجنس عندنا حرام الا فى الجواز و الجواز عايز البيضة والبيضة عند الفرخة ...وانتوا عارفين الحوار اللي حمض

و الراجل بيتعرض لقصف نيرانى من كل جهة وعنده غريزة انتوا بلبسكوا وتصرفاتكوا بتحولوها لجمرة نار

وانتوا مش عارفين ولا حاسين انكوا كده بتتحرشوا بينا كرجال

ولكن الفرق بين التحرش بالمراة والتحرش بالرجل

ان تحرش الرجل بيحصل من راجل واحد تجاه مرأة واحدة ولكن تحرش المرأة يحدث من النساء كلهم تجاه كل رجل على حدة يعنى مكثف كمان

انتوا تقدروا تبلغوا عن الراجل لو تحرش بواحدة انما احنا مش هنروح نبلغ عن واحدة ماشية بطريقة مش مظبوطة او لابسة محزق او لابسة عريان

عشان تلبسوا المحزق والعريان زى نساء الغرب و بتطالبونا نتفرج و نسكت زى رجالة الغرب

يبقى اولا لازم تكونوا انتوا زى نساء الغرب ولازم نكون احنا زى رجالة الغرب و لازم تكون حياتنا و ظروفنا و عاداتنا وقوانيننا و ديننا زيهم

و ده مش متحقق دلوقتي ولا هيتحقق ان شاء الله ... علي الاقل واحنا عايشين

يبقى لا انتوا يا بنات هينفع تلبسوا اللى على كيفكوا و تعيشوا فى امان ولا احنا هينفع نشوف ونسكت و منتكلمش ومنعترضش

احنا مجتمع بنشتكى من سلبيتنا تجاه اى حاجة بتحصل قدامنا

متوصلوناش لأننا نعتبر الاعتراض المادى باللمس لأى شاب على اللبس المستفذ لأى بنت شئ ايجابى

كل اللى بنطلبه ان البنت تراعى الحد الادنى من الاحترام و تراعى ظروف المجتمع اللى هى فيه و اللى مش هينفع تتصلح دلوقتى و تراعى ربنا قبل اى حاجة

واتمني من حزب انصار العاريات الا يحجموا وبنفس الحماس عن نصرة العفيفات .‏

اقتباس :: مش الراجل يحترم نفسه و البنت تعمل ما بدالها

لا طبعا .. الاتنين يحترموا نفسهم

البنت قبل الولد ..

اقتباس :: هتقول البنت حرة تلبس اللى هى عاوزاه

أنـــت حر مالم تضــر ..

حره لو محدش بيشوفها وهي ماشيه .. لكن دي بتخلي الشعب كلو يبصلها وممكن اتنين في الشارع يتخانقوا بسببها

اقتباس :: و كده نبقى متعادلين هى تجاهلت رأينا و لبست اللى على كيفها واحنا نتجاهلها لو اتعرضت للى نبهناها ليه ومسمعتش كلامنا

منطقـــي ..

بس طالما قادر تساعد أو تمنع ضرر عن انسانه ليه تمنع نفسك ؟؟

الحكايه مش بنعاند في بعض .. انت ممكن بعدم مساعدتك ليها تنهي حياتها

هتقولي تستاهل .. هقولك مش أخلاق المسلم

انت ساعدها واعمل اللي عليك .. وهي جزاءها عند ربنا

اقتباس :: يعنى اتعلم عليها 365 مرة يعنى بقى ليها 365 سمعة بقى ليها 365 قضية الناس هتختلف ان كانت ضحية ام مذنبة فيهم

هي الجانيه على نفسهــــا ..

ربنا ميـــز الانسان بالعقل .. تتحمل مسؤلية تصرفاتها ..

اقتباس :: كل اللى بنطلبه ان البنت تراعى الحد الادنى من الاحترام و تراعى ظروف المجتمع اللى هى فيه و اللى مش هينفع تتصلح دلوقتى و تراعى ربنا قبل اى حاجة

دي حاجه البنت المفروض تراعيها من نفسها .. بس البنت بقت بتحب تتعاكس وكأنه كده بيمدحها

طبعا هو بيعاكسها وعارف انها مش مظبوطه

***

بس بقى الجديد عند الشباب اليومين دول ان أي حاجه تحت مسمى انثى بقت بتتعاكس ويتبصلها

أنا مامتي منتقبه ولبسها واسع جدا طبعا ومابيبانش منها أي حاجه حتى عينيها وبتتعاكس في الشارع

مش فاهمه ده نسميه ايه ؟؟

مفيش أي مبرر للولد انه يعمل كده بصراحه

***

دايما نلاقي هجوم شرس على البنات من جهة الشباب وهم مش حاسين هم بيعملو ايه

يعني بنت مش محترمه بتتعاكس وقلنا تستاهل .. لكن المنتقبات دلوقتي مش سايبينهم في حالهم

طب نعمل ايه اكتر من كده ؟؟

***

المجتمع عايز دمار شامل ..

***

موضوعك جميل ومميز

أحييك عليه .. :flower:

هى المشكلة مبقتش مشكلة البنت لوحدها
ولا مشكلة الولد لوحده
وانا كلامى سبق وقلته قبل كدة ف موضوع المعاكسة واجب وطنى دة تقريبا
بس بجد مش من حقنا نقول الولد هو الغلطان ولا البنت لوحدها
الولد عليه جزء
والبنت عليها جزء
والبيت عليه اكبر جزء
واللى الشباب بيشوفوه ف الدش وع النت هو المصيبة الكبيرة
هى حلقات مترابطة ببعضها
مفيش تربية ف البيت صح
مفيش دين يتعلموه الولاد صح عشان يبقى طالع عارف وفاهم انى حرام اعمل دة
لان زى ما حضرتك قلت الجنس ف ديننا حرام الا ف الزواج
مفيش تربية دينية صح تطلع بنت تقول لا
انا جوهرة .......دينى قال كدة
وانى لازم اتصان واحافظ على نفسى وعلى جسمى اللى يعتبر جزء من كرامتى
جزء من كرامة ابويا واخويا وخالى وجدى وامى واللى هيجى يناسبنا ف عيلتى لاختى ولا لبنت خالتى ولا لمين ولمين

مفيش دين صح
يمنع البنت انها تقلد واحدة متبرجة طالعة ف التليفزيون وكاشفة نفسها وشبة عارية
مفيش دين صح يخلى الولد اول ما يشوف حاجة تخدش الحياء انه يحول عنها
كل دى اسباب للى بيحصل
خلت ولادنا وكانهم مرضى نفسيين لا يتحكمون ف انفسهم بانهم يعملوا كدة ف البنات وحتى السيدات الكبار
واكبر دليل هى جرايم الاغتصاب للبنات الصغيرين
كل دة خلى بناتنا ميحافظوش على نفسهم ويقولوا البس حاجة تصوننى وتستر جسمى
خلت البنات الصوغيرين مابيصدقوا انهم يوصلوا لسن شوية كبير
ويعملوا عمايل ف نفسهم ولا بنات كبار وستات كبار
العيب مش ع البنت ولا ع الولد
العيب على مجتمع مش حاكم الناس والمفروض انه مجتمع دينى وبلد اسلامى
العيب على اسرة مفيهاش اب يحكم البنت ويشوفها لابسة اية قبل ما تنزل ويقول للولد ويفهمه ويربيه ويقوله اختك ممكن يتعمل فيها زى ما بتعمل واكتر وامك كمان
العيب على اسرة مفيهاش ام تقول للبنت وتكلمها وتفهمها
ان البنت تبقى ساترة نفسها وهى حابة انها تعمل دة
تقولها انتى حاجة غالية اوى
اوى ترخصى نفسك وتفرطى فيها
معلش طولت عليكم
بس الموضوع فعلا مهم
ربنا يستر علينا وعلى شبابنا وبناتنا ويهيدنا كلنا

ضى الروح كتب:: العيب مش ع البنت ولا ع الولد
العيب على مجتمع مش حاكم الناس والمفروض انه مجتمع دينى وبلد اسلامى
العيب على اسرة مفيهاش اب يحكم البنت ويشوفها لابسة اية قبل ما تنزل ويقول للولد ويفهمه ويربيه ويقوله اختك ممكن يتعمل فيها زى ما بتعمل واكتر وامك كمان
العيب على اسرة مفيهاش ام تقول للبنت وتكلمها وتفهمها
ان البنت تبقى ساترة نفسها وهى حابة انها تعمل دة
تقولها انتى حاجة غالية اوى
اوى ترخصى نفسك وتفرطى فيها
معلش طولت عليكم
بس الموضوع فعلا مهم
ربنا يستر علينا وعلى شبابنا وبناتنا ويهيدنا كلنا

يا جماعة الوضوع عاجبني
وأنا كنت طرحته قبل كده في موضوعي
بس أنا حابب أقول مقدمة بسيطة أدخل منها للرد

مع إحترامي ليكي يا عهود كونك معانا في المنتدى ومن السعودية
بس إنتي أكيد عارفة إن كلامي ده مش بفتري فيه على حد
وإنه موجود في الواقع

أيام الملك فهد _ رحمه الله _ العظيمة
كنا نقدر نقول بجد السعودية بلد إسلامي محافظ ومجتمع مترابط ومحافظ
كنت تلاقي في حالة فصل بين الجنسين إلى حد ما
كنت تلاقي هيئة الأمر بالمعروف والنهي عن المنكر في كل الأسواق والحدائق والأماكن العامة
إلي بيحصل فيها إختلاط
وممكن يحصل إيذاء من الشباب للفتيات عن طريق المعاكسة أو التحرش أو خلافه
وفي عقوبات رادعة _ مش هزار _ يعني

أنا أصدي من الكلام ده
إني أقول إن في مراقبة بشكل مستمر
ومع كل ده
بيحصل بلاوي سودة

المشكلة مش بس من البنت يا جماعة

علشان الموضوع ده متحامل على البنات أكتر من اللازم

ولا من الولد لوحده
ولا من اللبس لوحده

المشكلة إنها مبدأ عند الشخص
إلي من وجهة نظري شايف إنه المذنب الأكبر

لإنه لو كانت المعاكسة إقتصرت بس على الفتيات الشباب _ الصوريخ _ إلي بيلبسوا
المحزق والملزق
والقصير والمحور
كنا قلنا : البنت دي تستاهل

لاكن طالما الموضوع وصل للمنقبات والستات الكبار

يبقى في حاجة غلط
يبقى هيه مسئلة مبدأ عند الشاب
هوه يرضه إنه يتعمل كده في والدته أو أخته ..... الخ
صدقني لو سألته هيحصل حاجة من اتنين
هيقول لأ طبعا
أو
هيحط وشو في الأرض

كتير يا جماعة إلي بيحصل ده
وصدني هوه دين هيتردلك في أهلك أيا يكن

فراعي الله في أهلك

معلش طولت عليكوم
ولوا حد معترض على كلامي يناقشني
وأنا صدري رحب للمناقشة البناءة

:flower: :flower:

اقتباس :: ناس هتكون متدينة شوية وناس قالعة خالص وناس بتتمرجح فى النص
و عليه العوض

وده تقريبا اللي بدا يحصل دلوقتي لأن العوره عند المراه كلها ما عدا يدها ووجهها وما بيظهاروش المفروض إلا في ظروف الزواج يعني السبب من سترة المرأه انها تغطي العوره بس هيا للاسف رمت بالسبب ده عرض الحائط واستمتعوا غلط بطريقتهم الخاصه بدنيتهم وهيتبهدلوا في الأخره ولو أحنا سكتنا هنروح معاهم بس المطلوب واللي انا ملاحظه من كلام الدكتور اممم انه بيحاول يخلي الناس تمد أيداها في ايد بعض علشان يتحدوا أغوائات الشيطان ويحافظوا على دنيتهم وأخرتهم كمان مش يبقا مبدأهم (بلاش وجع الدماغ ) انتا معقد يلا ولا ايه (خلينا نستمتع بالجمال الرباني ) وده مش معناه ان انا ملتزم قوي بس والله لو لقيت البنات أتغطوا وبطلوا عرض أجسامهم في الملابس الضيقه زي الأكسسوارات هفرح والله بيهم وبننفسي وهيكون عندي امل في بكره .

اقتباس :: كل واحد فينا كبير كفاية انه يعرف الصح فين والغلط فين .

والله كلام صح جدا يا دكتور لو كل واحد بص في المرايه وقال أنا ايه اللي بعمله في نفسي حطيت فيها فيرس أسمه الغريزه والشهوه ما كنتش فاكره فيرس حميد أتاريه طلع خبيث ليه تحط نفسك قدام سؤال جوابه البعد عن الله وعدم الخوف منه
نفسك ديه عباره عن مجموعه من الانفاس اللي هتنسأل طلعت النفس ده في ايه بدل ما تقول طلعته في ذكر الله تقول طلعته في كلام رومانسي ياريت كل واحد فينا يعيد حساباته ويشوف أيه هدفه من الحياه وهو أرضاء وجه الله باي عمل.

اقتباس :: انك بلبسك تخلي البنت الصغيرة تكبر وهي حاطة في دماغها ان الطريقة الوحيدة علشان تنول نظرة اعجاب من ولد أو كلمة حلوة هي انها تبرز مفاتنها وتتجمل وتكشف جسمها ده أكبر أذى

مش هبالغ وأقول انك جيت على السبب الرأيسي بس هقول ان ده اكبر عامل بيسبب العاده السيئه ديه وهيا التقليد الاعمى للعادات الخاطئه وبجد انا نفس ان كل واحد يكون له نظره في موضوع العادات ده ويعيد تقيمها مره واتنين على حسب الاوامر بتاعت الإسلام

اقتباس :: اتعلمتوا كلمة انا حرة و تحت شعار الحرية بتعملوا كل حاجة وأى حاجة

الحريه شئ جميل بس لو كانت له أسس مبني عليها وتون بعد سن التعليم ده رأيي الحريه مش انك تعمل الغلط وتعلله بالحريه وبعدين لو قولنا انتا حر في نفسك الكلام ده بينطبق لو أنتا في جزيره لوحدك بس انتا في عالم كل شخص بيكمل التاني ويعتبر جزء من الاخر ولو أنتا حر يبقى لازم تحط قواعد وشروط لحريتك قبل ما تتعدى على حرية الاخرين

اقتباس :: واتمني من حزب انصار العاريات الا يحجموا وبنفس الحماس عن نصرة العفيفات .‏

بجد يا دكتور موضوع مهم جدا وجميل جدا وأنا عجبني أسلوبك في الكلام وترتيبك لأفكارك ومع احترامي لجراتك في الحديث بس
ممكن انك تلمح عن الأشياء السيئه بأسلوب تلميح لأن انا بصراحه لاحظت أنك ما شاء الله عندك جرأه جامده مع كامل تقديري ليك انك متعصب للوضع بس علشان ما نجرحش حباء حد بس وبجد كلنا معاك في كلامك ومستنيين مواضيعك الجميله ديه يا دكتور بجد كلامك بيفكرنا بحاجات مهمه جدا اهمها.... دينا

:flower: :flower: :flower: :flower:

جزيتم كل خير على اثارة هذا الموضوع :flower:

اقتباس :: لو قولنا ان البنت من حقها تلبس اللى هى عاوزاه و اللى يقرب منها يتعاقب
اوك مفيش مشكلة لو فرضنا كل يوم هيقرب منها واحد

يبقى اخر السنة هيتحرش بيها 365 واحد كل واحد منهم ليه قضية واحدة بس واللى بيعمل كده مبيهموش قضايا لكن البنت ليها 365 قضية

يعنى اتعلم عليها 365 مرة يعنى بقى ليها 365 سمعة بقى ليها 365 قضية الناس هتختلف ان كانت ضحية ام مذنبة فيهم

ساعتها خلى البنت تفرح بعقاب الجناة

انا مختلف معاك فى النقطة دى
القضايا اللى اتحطت دى اكيد عشان تعاقب اللى بيتحرش او بيعاكس
ومتقوليش ان اللى بيعمل كدة مبيهمهوش القضايا
لا طبعا
اكيد بيخاف على نفسه ويخاف من العقاب
يعنى لو حصلت قضية تحرش والجانى اخد عقاب صارم
اكيد اى واحد عايز يتحرش بواحدة بعد كدة هيفكر الف مرة قبل ما يقدم على فعل مشين وحقير زى ده
وبعدين البنت مش هتضر زى ما بتقول ولا هيتعلم عليها
بالعكس دى هتكسب احترام الجميع لانها حافظت على نفسها
مش معنى كلامى انى بقول ان البنت تلبس محزق وتسيب شعرها وتمشى لامؤاخذة تتقصع
دى اكيد تستاهل اللى يجرالها
بس انا بتكلم عن البنات المحترمه اللى ملهمش ذنب وفى معظم الاحيان بيتعرضوا للمعاكسات زيهم زى اى واحدة تانية من اياهم
وبجد دلوقتى لم يعد هناك فارق بين المحجبة او الغير محجبة عند اللى بيعاكس
كله بيتعاكس
الموضوع ده خطير جدا ومش لازم نستهون بيه
احنا كدة ممكن ندخل على مرحلة كارثية لو فعلا ظل الحال على ماهو عليه
ومن وجهة نظرى ان المشكلة الاساسية هى البطاله وانخفاض مستوى المعيشة
فالشاب العاطل ليس له دخل
وبالتالى لايستطيع الزواج
فيلجأ الى اى شئ لاشباع رغباته
وبالطبع التحرش اشباع لاحد رغباته ومن ثم يلجأ اليه
اما اذا توافرت الوظائف وارتفعت مستويات المعيشة فبالتاكيد سيتغير الحال
صدقونى العيب الاساسى فى نظام الدولة اللى ماشية بالبركة

ربنا يستر علينا