أين تذهب هذا المساء؟؟؟؟

سؤال ممكن يحير ناس .. وفى ناس تانية عارفة سكتها كويس .... بس تعالوا نفكر مع بعض ممكن تخرج فين فى إسكندرية .

المكان اللى مفهوش إختلاف وكل الناس بتخرج فيه شباب وبنات وعائلات وأطفال هو الكورنيش.. وفعلا من أجمل الحاجات فى إسكندرية البحر والكورنيش والترمس والحلبسة وخصوصا خصوصا فى الشتاء .

ومن أكتر الأماكن اللى تلاقى الناس بتروحها ،المندرة وسبورتنج مع واحد بوريو وسكلانس من عند عصير مكة ،وكوبرى ستانلى لازم تلاقى عرسان بيتصوروا هناك، وأساسى طبعا محطة الرمل والفيشار والأيس كريم ، وياسلام لو روحت المنشية وتضرب شويه كبدة بالليل تجبلك حموضه للصباح الباكر، بس خلى بالك وانت فى شارع الغرفة التجارية من البايعين اللى بيشدوك بالعافية جوه المحل ويتخنقوا عليك وانتم مفيش فى جيبك غير 5 جنيه.

وتانى مكان هو بحرى والقلعة .. وهناك برضه تلاقى جميع طوائف الشعب .. يعنى غنى وفقير ، شاب وعجوز ، شلة وعيلة ، وخصوصا بعد التجديدات الجميلة هناكوطبعا لازم تعدى على عزة وأقصد هنا طبعا أيس كريم عزة ، وفى بحرى لازم العشاء من عند أنا ميدو.

وتالت مكان ممكن تخرج فيه بلازا والداون تاون وكارفور وسان استيفانو، ولكن فى الأماكن ده النية تختلف من شخص لأخر ومن شريحة لأخرى، يعنى الشباب المرتاحة بتروح هناك عشان تشترى هدوم والذى منه .. وممكن تريح فى كافيه شويه بس المنيمم شارش هناك مش أقل من 20 جنيه ، ولو شباب مش مرتاحة أوى بيخرجوا هناك علشان يتفرجوا بس مش على المنتجات المعروضة ولكن على حاجة تانية .....

أما الناس الرايقة اللى بتاخد الاب توب وتروح كوستا وأخواته وتعد تشيت وتخش على الفيس بوك مع واحد ميلك تشيك كبيييييير.

وفى طبعا الآنسات اللى غاويين يروحوا المول يتفرجوا ويجيبوا حاجات كتيييير .. ملهاش أى تلاتين لازمة... لكن معلش حقهم برضوا.

أما بقى الشباب الجامد اللى عارف هو رايح فين ... طبعا عند عم حودة بتاع البلاى ستيشن .. وللصباح الباكر كورة وكراش ومصارعة ... ولما المعدة تطلب زيكو تلوث موجود.

وطبعا الناس الرومانسية أوى عارفها طريقا كويس .. وهو الطريق الى المنتزه ... الجو الجميل والسما الصافية والخضرة والبحر الأزرق ... يعنى حاجة تخلى الحجر ينطق ... بس ياريت متتأخرش هناك عن الساعة 11 بالليل.

أما بقى الناس اللى غاويه النوادى وجوها فطريقها سهل وميسر .. وعندها النوادى الخاصة زى نادى سموحة ونادى سبورتنج ، أو النوادى اللى على البحر زى المهندسين والمحامين والأطباء ودلوقتى نادى التطبيقين...وبنصح العائلات تروح الأماكن ديه كويسه ورخيصة ومحترمة جدا.

على العموم الخروج ده مزاج .. وكل واحد عنده مكان وناس وخروجه مميزة وبيحبها....

ممكن اروح القلعه

» اين تذهب روحك وانت نائم