أصله طيب !!!!!

اصله طيب


[ندعوك للتسجيل في المنتدى أو التعريف بنفسك لمعاينة هذه الصورة]





- آلو .. أيوة يا
جمعاوي ؟
- انت فين يابني ؟ سايبني ملطوع كدة في الشمس ؟ دانا قربت أسيح
-
معلش .. حصل لي مشكلة .. ربع ساعة وحكون عندك
- بسرعة يا عبده .. يا
إما تبقى تجيب معاك كوباية تعبيني فيها


كنا متفقين أنا وعبده نتقابل عشان أروح معاه وهو بيعمل
اختبار رخصة السواقة .. وعلى فكرة عبده دة يبقى من أعز أصحابي .. وأنا شايف
إن هو وأمثاله لازم يتحطوا في متحف .. أو يعملولهم محمية طبيعية قبل ما
ينقرضوا .. ودة لأن فيه صفة بقت نادرة جدا في زمانّا دة
والصفة دي إن هو
( طيب )
آه والله .. تصدقوا إن في عصرنا
دة لسة فيه حد زي ما بيقولوا : "على نياته"
بعد ما بقت كلمة طيب عند كتير من الناس معناها غبي أو حتى -آسف في
اللفظ- أهبل أو عبيط .. وبقت الطيبة قناع
يلبسه الناس عشان يخدعوا بعض ..
وانتشرت مقولة : "اعمل عبده" .. يعني اعمل نفسك عبيط ومش واخد بالك
أهو
عبده دة يبقى هو صاحبي اللي بكلمكم عنه

وعشان
تصدقوني ححكيلكم موقف من مواقف عبده الطيب ..
يعني مثلا كان مرة بيناقشني وبيحاول يقنعني إن الذكاء وراثة :
-
طب ليه يا عبده بتقول كدة ؟
- أصل أنا بذاكر مهما أذاكر .. وبرضه مفيش
فايدة .. لكن أولاد الدكاترة اللي هما أصلا أولاد دكاترة ما شاء الله عليهم
.. بأقل مجهود ألاقيهم من الأوائل .. عرفت بأة إن الذكاء وراثة ؟
- يا
حبيبي مش الذكاء هو اللي وراثة .. دي حاجات تانية هي اللي وراثة
- قصدك
إيه يعني ؟
- أصل انت طيب أوي يا عبده ..
ناقص تقول لي إن الذكاء الوراثي هو سبب تولي بوش الابن رئاسة أمريكا .
وبشار الأسد رئاسة سوريا .. وإنه حيكون سبب تولي ..... انت شكلك حتودينا في
داهية

مش بقول لكم طيب .. أسيبكم بأة عشان عبده وصل

- إيه يا عبده اتأخرت
ليه كدة ؟
- معلش يا جمعاوي .. أصل أنا كنت في رعاية الشباب بقدم ورقي
-
ورق إيه يا عبده ؟
- أصلي كنت ناوي أرشح نفسي لانتخابات اتحاد الطلاب
.. لكنهم خلوني أكتشف النهاردة إن أنا مش كفء للموضوع دة
- انتخابات إيه
بس !! هو انت ملكش أي قريب أو صديق أو معرفة بحد من الحزب الحاكم ؟
-
لأ خالص .. بس إيه علاقة دة بالموضوع ؟
- أمال كنت رايح تقدم إزاي بس ؟!
انت شكلك طيب ع الآخر .. طبعا لازم ما يرضوش
بيك
- لا يا جمعاوي ما تقولش كدة .. أكيد العيب فية .. المفروض إن بتوع
الحزب الحاكم دول أكثر ناس حريصين على مصلحة البلد .. لأن الناس اختارتهم
في الانتخابات
- ناس مين اللي انتخبوا مين ؟! انت انتخبت حد منهم؟
-
لأ .. بس أكيد ناس كتير اختارتهم .. أمال نجحوا إزاي يعني ؟
- مش بقول
لك انت طيب .. دول يا حبيبي نجحوا بحاجة شبه
الذكاء الوراثي اللي كنت بتقول لي عليه .. ناقص تقول لي إنك لما تتخرج
حتشتغل من غير واسطة
-واسطة !! أعوذ بالله .. انت عارف يا جمعاوي إني مش
من الناس دي .. دول قلة مندسة لازم نحاربهم مش نقلدهم
- قلة ؟! ..
المهم ياللا بينا عشان نلحق مشوارك بتاع الرخصة دة

أخدت
عبده وركبنا المشروع في طريقنا لمكان الاختبار .. وفجأة فرمل السواق ورجع
بظهره وكسر في شارع جانبي .. ثم اتخذ طرقا ملتوية .. فقلت :
-
إيه يا عم فيلم الأكشن اللي إحنا فيه دة ؟!
- السواق
: معلش يا بيه .. أصل الضابط واقف
- أنا :
ماشي يا أسطى .. ربنا معاك
- صاح عبده :
أنا مش فاهم .. إيه يعني الضابط واقف .. هو انت معاك مخدرات ولا حاجة ؟
-
السواق : إيه يا باشا .. انت مش من هنا ولا
إيه .. بقول لك ضابط المرور واقف
- عبده :
المفروض إن الضابط جي ينظم المرور مش يكعبلها
- السواق
: المفروض .. روح قله بأة
- عبده :
لأ .. انت أكيد ورقك ناقص .. أو مخالف
- السواق :
إيه يا جدعان .. حد يقول له حاجة .. الضابط يا باشا بيطلعك كدة كدة
غلطان
- عبده : وهو حيستفيد إيه يعني ؟
.. وبعدين إيشمعنى العربية اللي جنبك مشت على طول
- السواق : انت ما شفتش نمرتها .. دي 3 أرقام بس ..
يعني لا مؤاخذة بتاعة حد من الناس المهمين
- عبده
: أيوة .. هما دول الناس اللي بيمشوا صح .. عشان المخالفين زيك
يتعلموا منهم .. لأنهم أكتر ناس بيحترموا القانون
- السواق : يا بيه انت شكلك راجل طيب

فضلت
أحاول أهدّي الكلام بين عبده والسواق لغاية ما وصلنا لمكان الاختبار ..
دخل عبده يخلص الأوراق وبعدين وقف مستني دوره في الاختبار ..
ثم اقترب
منه رجل سمين وسلم عليه :
- إزيك يا أستاذ عبده .. أنا عم فتحي
-
الحمد لله .. حضرتك تعرفني ؟
- أنا يا بيه اللي حركب جنبك وانت بتمتحن
-
آه .. أهلا وسهلا
ثم اقترب منه فتحي وقال بنظرة
خبيثة :
- كل سنة وانت طيب يا بيه
-
وانت طيب
- بقول لك كل سنة وانت طيب .. وكلك نظر يعني
- ما قلتلك وانت طيب
ثم التفت إلي وسألني :
-
هو فيه عيد النهاردة يا جمعاوي
قاطعه فتحي :
أنا حجيبلك من الآخر .. أنا عايز أشرب شاي
عبده
بتلقائية : طيب اتفضل حضرتك .. أنا مستنيك
تدخلت
قائلا : يا عبده الراجل عايز قهوته
عبده :
شاي إيه وقهوة إيه ؟! انتم شايفني أوبن بوفيه ؟!
أنا
: الراجل قصده إنك تشبرقه عشان ينجحك في الامتحان يعني
عبده بغضب شديد : إيه اللي انت بتقوله دة يا جمعاوي
.. رشوة يعني ؟!
بص يا عم فتحي انت .. أنا راجل شريف .. إوعى تفكرني من
المفسدين دول .. وعلى فكرة أنا بعرف أسوق كويس جدا .. ومش محتاج حد ينجحني
فتحي : خلاص يا عم .. انت حتسيحلي ولا إيه ..
أشوفك في الامتحان يا أبو الفتاكة .. سلام

طبعا
كلكم متوقعين اللي حصل في الامتحان .. نجح عبده بدقة مذهلة في إصابة كل
الطراطير اللي ع الأرض .. وعمل حرف X بدل حرف الـ S .. أما بالنسبة للّفة
الكاملة (360) فقد قام ببراعة بأداء أكتر من 20 لفة متتالية
نزل عم فتحي
من العربية وهو بيبص بشماتة وخبث .. ثم نزل عبده وهو بيطوح زي السكرانين
.. بصراحة ما قدرتش أمسك نفسي من الضحك وأنا بقول له :
- حمد
الله ع السلامة يا بطل
لكن اللي نرفزني وجنني
رده المستفز :
- تصدق يا جمعاوي أول مرة أكتشف إني ما بعرفش أسوق
قلت بغيظ :
- لأ !! .. إوعى تقول لي إنك ما
فهمتش اللي حصل
أجاب ببراءة :
- اللي
حصل إني فشلت .. ما كانش لازم أتقدم للاختبار إلا لما أتأكد إني بعرف أسوق

سبت عبده وروحت وأنا
عمال أضحك من مواقفه الساذجة .. وأستغرب هو إزاي عايش في البلد دي

لكن بصراحة بعد ما قعدت
مع نفسي .. وفكرت في كلامه وردود فعله ما بقيتش عارف .. هل هو طيب ومش فاهم ومضحوك عليه ؟

ولا إحنا اللي طيبين

ومضحوك علينا ؟؟؟

********************

ملحوظة : اللي مفهمش
حاجة من القصة يبقى طيب .. وأحسن له يدور على
محمية طبيعية قبل ما ينقرض.

انا عن نفسي يا ريت ابقي طيبه ولو في نظر الناس عبيطه اهم حاجه معملش اي حاجه تغضب ربنا
موضوع جميل في محله

اولا القصه جميله جداااااااااااااااااااا
ثانيا انا مع الدكتوره ان اهم حاجه الواحد يحرص عليها هي رضا ربنا حت لو فيها خساره ناس
ثالثا تعليق اخير ان الناس من كتر اللي شافته مثل ابن الدكتور يتعين ومن الاوائل علي طول وولاد الرؤساء زيهم حبت الناس تطنش معجبهمش فحولوا يطلقوا مسميات اخري علي الحاجات دي زي ابن الدكتور اشطر واحد فينا وابن الرئيس اصلح واحد لمنصب الرئاسه
أرجو ان فكرتي تكون وصلت

شكراا على مروركم يا دكاترة

اقتباس :

أرجو ان فكرتي تكون وصلت

والفكرة وصلت يا
picasoo

على فكرة بقى
الموضوع جامد جدا جدا وفة مكانه ووقته بالظبط
بس مع احتراى للجميع
للكدتورة امه الله
وpicasoo
انتوا الاتنين بالصلاه على النبى
غلطانييييييييييييييييييييييييييييين جدا جدا
احنا ماينفعش نبقى كدة خالص والله ماينفع لو احنا اخترنا نكون طيببن والله ماهنعيش فى البلد دى
ايوة بجد والله مش هاتعرفوا تعيشوا
اولا الطيبه اللى بيتكلم بيها عبده دى مش طيبه
دى سذاجه مع احترامى للشخص انا قصدى الصفه
اولا انا ضد الرشوة وضد الوساطه وبكرهم كرة العمى مع انى ساعات فى بعض الامور امتلك الواسطه بس مابستخدمهاش لانى ببساطه بكرها
بس بدل ماتفضلوا طيببن يادكاترة المفروض ان انتوا تحاربوها مش تسكتوا وتبقو طيييييييييييين
لا دة باختصار اللى عايزاه الاعداء واظنكم عارفين مين هم بالظبط
عايزين الجيل اللى طالع يطلع مش فاهم حاجه ولا ليه فى اى حاجه وطيب ويتاخد على قفاه (يامؤاخذة)
علشان لما حقك يضيع ماتقدرش تتكلم ولا تملك السلطه علشان ترجع حقك
عايز كاتغضبش ربنا انا معاك واحنا كلنا ضعفاء
بس مش معنى كدة ان انتوا تبقوا طيببن
لا خد حقك وبردوا ماتغضبش ربنا
نرجو ان الفكرة تكون وصلت

انا ارتحت لما فهمتني يا دكتور احمد [ندعوك للتسجيل في المنتدى أو التعريف بنفسك لمعاينة هذه الصورة]

انا معاك يا دكتور مصطفي
ولكن
انا عمر مكان قصدي ان احنا نبقي طيبين لدرجه
الهبل
ولكن
لو حضرتك رجعت لما كتبته الدكتوره امه الله 17
ان هي وانا فضلنا الطيبه علي فعل ما يغضب ربنا
ولكن
انا عمري مطنشت عن سرقه او رشوه
ولكن
بحاربها بكل صورها
واضح ان فكرتي موصلتش ليك

معتقدش ان لسه فى حد كده اظن كل الناس خلاص فهمت اللعبة بقى
اللى عبده فيه ده حاجة من الاتنين ياما سذاجة ياما سذاجة
شوف انت بقى
لا بجد خلاص العيل الصغير بقى عارف شغل الحكومة كويس وبقى سيايى وشوية شوية هيطلع يرشح نفسه قدام ................ اللى بالى بالك
شششششششش هنتاخد تحرى ان شاء الله
عارف بقى نفسنا يكون فى عبده يبقى فاهم الامور كده وناصح ويوقف القرف اللى احنا فيه ده
وعبده يتجوز ويجيب كمان عبده ونعيمة وفوقية وحسنين ومحمدين وعوضين وكل حاجة منها اتنين
وهما كمان يبقوا زى ابوهم يوفقوا المهازل لحد ما يتجوزوا ويخلفوا هما كمان .......................
وهكذا دواليك ياترى ده هيتحقق يا عبده كلنا بندعيلك تتغير ياعبده

عندك حق لان اللي بنبات فيه بنصبح فيه والمهازل اللي عبده بيقول عليها بقت بتتكرر مع الولد واخته واخوه الصغير وهتتكرر مع اخته اللي جايه في السكه وهكذا بنفس الطريقه فبقت الناس بتطنش وبعد كده اطلقوا المسميات الاخري اللي اتكلمت عنها فوق [ندعوك للتسجيل في المنتدى أو التعريف بنفسك لمعاينة هذه الصورة]

اقتباس :

عندك حق لان اللي بنبات فيه بنصبح فيه والمهازل اللي
عبده بيقول عليها بقت بتتكرر مع الولد واخته واخوه الصغير وهتتكرر مع اخته
اللي جايه في السكه وهكذا بنفس الطريقه فبقت الناس
بتطنش وبعد كده اطلقوا المسميات الاخري اللي اتكلمت عنها فوق

[ندعوك للتسجيل في المنتدى أو التعريف بنفسك لمعاينة هذه الصورة]

تمام صح الكلام

شكرا لمروركم يا شباب

ياريت فكرتى تكون وصلت ع رأى picasso [ندعوك للتسجيل في المنتدى أو التعريف بنفسك لمعاينة هذه الصورة]
انا لي عظيم الشرف ان حضرتك جبتي سيرتي في مشاركتك

اقتباس :

فى فرق بين الطيبه الى مش بتفكر بيها والطيبه الى تكون فاهم من خلالها الدنيا دى ماشيه ازاى

انا متفق معاكي وتوضيحك ده مفيد جداااااااااااااااااااااااااااااا

على فكره في ناس كده كتير ومش مقتنعه بمبدا الواسطه والشبرقه بس عاجلا ام اجلا بتلجا له عشان تمشي امورها وانا بقول كده طبعا وانا باسف على حالنا عشان كده العيب مش فينا واكيد كل واحد فينا جواه شخص طيب وعلى نياته بس الي يدور بقى وعلى فكره انا عجبتني جدا المقاله دي لانها بجد بتلخص الموضوع كله ومضحكه في نفس الوقت
مجهود رائع

اقتباس :

وعلى فكره انا عجبتني جدا المقاله دي لانها بجد بتلخص الموضوع كله ومضحكه
في نفس الوقت
مجهود رائع

شكرا جداا على مرورك يا دكتورة

الحمد لله ان الموضوع عجبكم