مبروك لقطر ...وياحزني عليك يا مصر

مبروك لقطر فوزها باستضافه كاس العالم 2022 ...رغم أن الفوز ده قلب عليا المواجع ....فى الصفر العظيم اللى اخدناه فى المونديال.

وفى مقارة بسيطة كده أحب أقول أن مصركانت بتنافس المغرب وجنوب افريقيا ...يعنى دولتين نص كم ...ورغم أن مصر هى الريادة والسيادة والحضارة والدولة الأم والكلام الحمضان ده أحدنا الصفر العظيم.

أما قطر فكانت بتنافس أمريكا أكبر دولة فى العالم ورغم كده فازت بـ14 صوت مقابل 8 أصوات لأمريكا ، رغم أن قطر ده حاجه كده صغيرة أكبر من مساحة باكوس بشويه صغيرة.

بس أكتر حاجه استفزتنى واحد بيقول أن دعم إسرائيل لقطر هو اللى فوزها ودليله على كده الطفل الإسرائيلى اللى طلع فى الإعلان ....أحب أرد بحاجة صغيرة أوى أكيد الدعم الإسرائيلى للأمريكا ومصر أكبر بكتير من دعمها لقطر ...وبعدين اللى على راسه بطحه يحسس عليها ، ما احنا واخدين معونة أمريكية سنوية وإسرائيل ناطلنا فى كل حاجه أكل وشرب واقتصاد ومصانع وغاز....وبرغم كده اخدنا الصفر العظيم.

قطر مش دولة ديمقراطية عظيمة أو عندها تاريخ وحضارة ...بس اللى بيحكموها قرروا أنهم يعملوا حضارة ليهم بجد ، ممكن بيستعينوا بالخارج كتير وده عيب كبير ، بس قرروا يحطوا دولتهم فى المقدمة ونجحوا فى ده ...وغلبوا أمريكا نفسها، وعلى فكرة معندهمش موارد غير البترول والغاز .

أما مصر اللى عندها كل حاجة ..موارد بشرية وطبيعية وتاريخ وحضارة وريادة ...ومعرفناش نتفوق على المغرب وجنوب أفريقيا ...عارفين ليه ...علشان القادة بتوعنا اهتموا بملوا الكروش والجلوس على العروش ...وهدموا حضارة الآف السنين وخلوا مصر زى الراجل الغنى اللى فلس وقاعد فى الشارع يشتم فى الناس ويفتكر أيا زمان وهو بيشحت من اللى رايح وجاى.

يا جماعة أنا مش عايز أحبطكم ..بس أنا عايز أقول أن الموضوع مش محتاج معجزة ...كل الحكاية أن احنا نقدر نغير نفسينا ونغير العصابة اللى حكمانا ، وصنخطط صح ونستغل مواردنا كويس وصدقونى مصر ده ح تبقى حاجة تانية خالص.

أخر نكته طلعت على موضوع قطر هى : هنأ الرئيس المصرى حسنى مبارك أمير قطر بفوزا باستضافه كأس العالم 2022 ووعده بحضور حفل الأفتتاح!!!!!!......

» مبروك لمصر